Empresas partícipes

Estas son as empresas que apostaron por colaborar coa iniciativa municipal Lugo Transforma, pioneira en Galicia, aportando un millón de euros máis aos 12 mobilizados polo Concello de Lugo.

A alcaldesa Paula Alvarellos, agradece o apoio e pon en valor a unión das empresas locais máis recoñecidas que ao igual que os e as lucenses se converterán en accionistas de proxectos innovadores.

Alibós

A actividade da fábrica de Alibos Galicia S.L. en Monterroso (Lugo) remóntase ó ano 1968. Dende entón traballan no aproveitamento dos produtos silvestres da zona, coma os cogomelos ou as castañas, e outros produtos de cultivo. Todos produtos naturais, da mellor calidade, que exportan dende España aos principais mercados mundiais.

Co “Proxectos Soutos”, están encamiñados a realizar novas plantacións e á recuperación de antigos soutos en Galicia, co fin de contribuír a un desenvolvemento sostible do medio rural e á conservación da biodiversidade dos nosos montes.

Candelas

Empresa familiar con máis de 40 anos de experiencia no sector do café. Un exemplo de crecemento progresivo e e sustentable, evolucionando de pequena empresa familiar a compañía con implantación internacional na distribución alimentaria e hostaleira. Compañía líder como torradora e fornecedora de café no sector da hostalaría e marca forte, positiva e recoñecida, vinculada á tradición e ás boas experiencias no mundo do café.

A súa misión é ofrecer cada día o produto de maior calidade a través dun servizo personalizado e directo; e contribuír no sector do café con coñecementos novos froito da investigación e da formación.

Dmanán

Dmanán é unha empresa de carácter inversor, que traballa de forma dinámica en diferentes sectores de interese para o mercado nacional e internacional como pode ser o das novas tecnoloxías, enerxías renovables, a área de saúde e benestar, sector inmobiliario ou adquisición de patrimonio.

Diversificamos o noso negocio para ampliar coñecemento e disminuír riscos. Buscamos negocios que polo seu interese poidan supoñer un beneficio e posicionamento para a nosa empresa, activa desde 2004.
Esta familia leva un gran percorrido ás súas costas, polo que conta con experiencia, habilidades e estratexias para a xestión de grandes empresas. A día de hoxe, xa nos fixemos un oco na construción de vivenda privada, industria hostaleira e na análise e captación de oportunidades fugaces.

El Progreso

Grupo empresarial galego de medios de comunicación composto na actualidade por “El Progreso” “Diario de Pontevedra” “Galiciaé” “Axencia Galega de Noticias”.

O grupo está presidido, desde 1993, pola editora Blanca García Montenegro.

Grupo Arenal

Arenal Perfumerías é unha empresa familiar creada en Lugo no ano 1976. Actualmente conta 67 tendas físicas e unha tenda en liña cunha ampla variedade de produtos de Beleza, Parafarmacia, e droguería aos mellores prezos. Con máis de 1300 persoas empregadas, son distribuidores oficiais das marcas máis prestixiosas do mercado, garantindo sempre a calidade e autenticidade de cada un dos produtos que distribúen.

Lence

Grupo Lence, empresa familiar fundada no ano 1975, é a única empresa láctea galega que está entre as seis máis grandes de España. A compañía só traballa con leite galega, impulsando a creación de riqueza no rural galego e realizando, así, un labor vertebrador do territorio. Actualmente, é a terceira empresa que máis leite recolle en Galicia e a única entre as catro primeiras que é unha empresa galega. Cunha firme aposta pola innovación, traballan con diferentes entidades educativas e institucións públicas e privadas para sacar adiante proxectos como Milkchain e Smart4Milk, cos que busca transformar o rural e apoiar ás ganderías a ser máis eficientes e ofrecer produtos diferenciadores e de maior nivel. Ademais, a compañía busca facer unha diferencia positiva na súa contorna, comprometéndose e colaborando con diferentes iniciativas sociais e deportivas.

Norvento enerxía

Con sede en Lugo, é unha compañía familiar que leva décadas operando no sector das enerxías renovables con capacidade de actuación integral. Abarca tanto a xeración centralizada con grandes instalacións eólicas, como a distribuída con solucións para o sector industrial, así como a fabricación de aeroxeradores de media potencia, conversores e sistemas de almacenamento de enerxía.

Afrontan os retos do futuro do sector enerxético, 100% renovable, co obxectivo de ofrecer as mellores solucións a través dos seus produtos, tecnoloxías e servizos fundamentados na innovación, a calidade, o deseño e sostibilidade.

Torre de Núñez

A empresa Torre de Núñez leva máis de 50 anos dedicada á produción de xamóns e embutidos de calidade. A tradición e a artesanía dos seus produtos, elaborados cunha das razas máis infiltradas do mercado, a raza Duroc, son a base do seu éxito.

Desde as súas orixes ofrece produtos de gran calidade, presumindo do seu xamón serrano Duroc cun 25% menos de sal que os produtos da súa categoría, avalados pola Fundación Española del Corazón.

Torsa Capital

Ademais de ser a empresa xestora do Lugo Transforma, Torsa Capital é unha sociedade xestora constituída no 2006 que na actualidade, xestiona ou asesora a un total de catro Fondos que acumulan un capital de 38 MM € con máis de 60 operacións de investimento realizadas.

O seu equipo fundador atesoura unha dilatada experiencia en diferentes campos da vida empresarial, tanto a nivel nacional como internacional, abarcando un extenso número de sectores de actividade industrial, tecnolóxica e de servizos.